Aðfangadagur er liðinn og því tími til kominn að fara út og hrista af sér jólasteikina og viðra sig aðeins. Þetta var það eina sem kom til greina annan í jólum.
Við höfðum frétt að eitt af okkar drauma svæðum sem kemur allt of sjaldan í aðstæður liti vel út og voru menn ekki í vafa hvert ætti að stefna. Var dagurinn tekinn snemma og keyrðu Arnar, Óðinn og Haraldur Örn beinustu leið í Eyjafjöllin þar sem stefnan var tekin beint á Paradísarheimt sem er hrikalega flott og voldug leið sem fer ská þvert yfir mest allan Paradísarfoss.
Ekki leið á löngu þegar næstu klifrarar mættu á svæðið, en það voru Palli Sveins og Arnar Þór sem skelltu sér í Skoruna, aðra flotta leið sem er rétt hægra megin við Paradísarheimt.
Arnar tók fyrstu spönn í þykkum mjúkum ís í frábærum aðstæðum upp í fyrsta stans. Haraldur tók þá næstu spönn sem var aðeins brattari með smá skelís en Óðinn massaði svo síðustu spönn sem endaði í stuttu stífu klifri í þunnu og nokkuð erfiðu íshafti sem hann leysti með príði. Alsælir og sáttir með klifrið gengum við meðfram sillunni sem klifrið endar í uppá topp og þaðan svo niðrí bíl aftur.
Hreint út sagt frábær dagur á fjöllum í þessari epísku leið.